loco Pilot :ரயில் ஓட்டுநர் ஆவது எப்படி

: ரயில்வே துறையில் கீழ் இந்தியன் ரயில்வே செயல்படுகிறது. உலகிலேயே 4-வது பெரிய ரயில் அமைப்பை இந்தியா கொண்டுள்ளது. இந்தியாவில் அதிகம் பேர் பயணிக்கும் மிகப்பெரிய போக்குவரத்தாக இந்தியன் ரயில்வே இருக்கிறது. ரயில்வேயில் மட்டும் 1.2 மில்லியன் பேர் வேலை செய்கின்றனர். இந்தியாவிலேயே ராணுவத்திற்கு பின்பு அதிகப்பேர் வேலைசெய்யும் அமைப்பாக ரயில்வே உள்ளது. அதிக பணியாளர்கள் கொண்ட பட்டியலில் உலகிலேயே 9-வது இடத்தைப் பிடித்துள்ளது. இந்நிலையில் ரயில் போக்குவரத்தில் முக்கிய பணியாக இருப்பது ரயில் ஓட்டுநர் பணி ஆகும். ரயில் ஓட்டுநரை லோகோ பைலட் (Loco Pilot)என்று குறிப்பிடுவர்.

ரயிலை இயக்குபவர் அதாவது ரயில் ஒட்டுநர் லோகோ பைலட் என அழைக்கப்படுகின்றனர். இந்தியன் ரயில்வே கீழ் இருக்கும் ரயில்கள் லோகோ பைலட் மூலம் இயங்குகிறது. இந்தியன் ரயில்வேயின் ஆட்சேர்ப்பு வாரியம் மூலம் ரயில்வேயில் இருக்கும் காலிப்பணியிடங்கள் நிரப்பப்படும். அந்த முறையில் தான் லோகோ பைலட்களும் தேர்வு செய்யப்படுவர்.

ரயில் ஓட்டுநர்/ லோகோ பைலட் பணியில் சேர வேண்டும் என்றால் அதற்கு 10-வது தேச்சி பெற்றிருக்க வேண்டும். அதனைத்தொடந்து, NCVT/SCVT மூலம் அங்கீகரிக்கப்பட்ட நிறுவனங்களில் ஃபிட்டர், எலக்ட்ரீஷியன், இன்ஸ்ட்யூமென்ட் மெக்கானிக், மில்ரைட்/பராமரிப்பு மெக்கானிக், மெக்கானிக் (ரேடியோ & டிவி), எலக்ட்ரானிக்ஸ் மெக்கானிக், மெக்கானிக் (மோட்டார் வாகனம்), வயர்மேன், டிராக்டர் மெக்கானிக், ஆர்மேச்சர் மற்றும் காயில் விண்டர், மெக்கானின்க் (டீசல்), ஹீட் என்ஜின், டர்னர் குளிர்பதன & ஏர் கண்டிஷனிங் மெக்கானிக் ஆகிய ஏதேனும் ஒரு தொழிற்கல்வியில் ஐடிஐ முடித்திருக்க வேண்டும்.

(அல்லது) 10வது வகுப்பு முடித்த பிறகு மேல் குறிப்பிட்ட ஐடிஐ பிரிவில் தொழிற்பயிற்சி பெற்றிருக்க வேண்டும் (அல்லது) 10ஆம் வகுப்பிற்கு பின்னர் மெக்கானிக்கல்/எலெக்ட்ரிக்கல்/எலெக்ட்ரானிக்ஸ்/ ஆட்டோமொபைல் இன்ஜினியரிங் ஆகிய பாடப்பிரிவுகளில் 3 ஆண்டுகள் டிப்ளமோ முடித்திருக்க வேண்டும். மேலும் இன்ஜினியரிங் டிகிரி படித்தவர்களுக்கும் லோகோ பைலட் ஆகலாம்.

இந்தியன் ரயில்வேயில் லோகோ பைலட் ஆக சேர வேண்டும் என்றால், அதற்கு ரயில்வே ஆட்சேர்ப்பு வாரியம் நடத்தும் தேர்வில் பங்குபெற்று தேர்ச்சி அடைய வேண்டும். லோகோ பைலட் பணிக்கு முதல் கட்டமாக உதவி லோகோ பைலட் ஆக தேர்வாக வேண்டும். அதனைத்தொடர்ந்து, அனுபவம் மற்றும் சேவை அடிப்படையில் சீனியர் லோகோ பைலட், லோகோ பைலட் மற்றும் லோகோ மேற்பார்வையாளர் என பதவி உயர்வு வழங்கப்படும்.

ரயில்வே ஆட்சேர்ப்பு வாரியம் (RRB) மூலம் ஒவ்வொரு வருடமும் உதவி லோகோ பைலட் காலிப்பணியிடங்களை நிரப்புவதற்கான அறிவிப்பு வெளியாகும். இரண்டு கட்ட கணினி வழி தேர்வு, கணினி வழி Aptitude தேர்வு, சான்றிதழ் சரிபார்ப்பு மற்றும் மருத்துவ பரிசோதனை ஆகியவற்றின் அடிப்படையில் உதவி லோகோ பைலட் தேர்வு செய்யப்படுவர். கண் திறன் பரிசோதனையும் செய்யப்படும்.

ரயில்வேயில் உதவி லோகோ பைலட் பணிக்கு 18 வயது நிரம்பியவர்கள் முதல் 30 வயது வரை உள்ளவர்கள் விண்ணப்பிக்கலாம். அறிவிப்பு வெளியாகும் தேதியின் படி, 30 வயதை கடந்திருக்கக்கூடாது. ஆனால், மத்திய அரசின் விதிமுறைகள் படி, எஸ்சி/எஸ்டி பிரிவினருக்கு 5 வருடங்கள் மற்றும் ஒபிசி பிரிவினருக்கு 3 வருடங்கள் வரை வயது வரம்பில் தளர்வு உள்ளது.

ரயில்வேயில் உதவி லோகோ பைலட் பணிக்கு தேர்வாகும் ஒருவருக்கு அடிப்படை சம்பளம் தற்போது 7வது ஊதிய முறைப்படி, ரூ.19,900 ஆக நிர்ணயிக்கப்பட்டுள்ளது. இதனுடன் அகவிலைப்படி(DA),வீட்டு வாடகை கொடுப்பனவு (HRA),மருத்துவ செலவுகள், போக்குவரத்து செலவுகள் கூடுதலாக வழங்கப்படும். அதன்படி, புதிதாக பணிக்கு சேர்ந்த உதவி லோகோ பைலட்டுக்கு மாதம் ரூ.24,000 முதல் ரூ.35,000 வரை சம்பளமாக வழங்கப்படும்.

முதலில் உதவி லோகோ பைலட் ஆக பணியை தொடங்கி காலத்தில் மேல் குறிப்பிட்ட சம்பளம் மற்றும் கூடுதல் சலுகைகள் வழங்கப்படுகிறது. சேவை காலங்கள் மற்றும் அனுபவத்தில் அடிப்படையில் சீனியர் லோகோ பைலட் ஆக பதவி உயர்வு கிடைக்கும்போது சம்பளமும் உயர்கிறது. சீனியர் லோகோ பைலட்களுக்கு ரூ.40,000 முதல் ரூ.70,000 வரை சம்பளம் வழங்கப்படுகிறது.

அகவிலைப்படி(DA),வீட்டு வாடகை கொடுப்பனவு (HRA),மருத்துவ செலவுகள், போக்குவரத்து செலவு, இலவச ரயில் பயணம், பணிக்கொடை மற்றும் பென்ஷன் ஆகிய கொடுப்பனவுகள் வழங்கப்படுகிறது.