கோடை சுற்றுலா… நீலகிரி மலை ரயில் பயணத்தின் சிறப்புகள் என்னென்ன?

நீலகிரி மலை ரயில் பயணம் (Nilgiri Mountain Train Journey) தனது அற்புதமான இயற்கை அழகு, சரித்திர முக்கியத்துவம், மற்றும் வியப்பூட்டும் பொறியியல் நுணுக்கத்திற்காக புகழ்பெற்றது. யுனெஸ்கோ உலக பாரம்பரியதாக அறிவிக்கப்பட்டுள்ள இந்த மலை ரயில், மேட்டுப்பாளையம் முதல் ஊட்டி வரை மலைப்பகுதியில் நெடுஞ்சாலைகள் வழியாக சுமார் 46 கிலோமீட்டர் பயணிக்கிறது. வழியில் பாலங்கள், சுரங்கங்கள், மற்றும் மலைத் தடங்களில் நெளிவுகள் ஆகியவற்றைக் கடந்து செல்லும் இந்த ரயில் பயணம் ஒரு கண்கொள்ளா அனுபவமாக இருக்கும். நீலகிரி மலை ரயில் இந்தியாவில் உள்ள மிகப்பழமையான மற்றும் இயந்திர இயக்கத்தைக் கொண்ட சில ரயில்களில் ஒன்றாகும்.

நீலகிரி மாவட்டம் வருகை தரும் சுற்றுலா பயணிகள் முதலில் ஆர்வத்துடன் எதிர்பார்ப்பது நீலகிரி மலை ரயில் பயணமே. மேட்டுப்பாளையம் முதல் குன்னூர் வரை இந்த மலை ரயில் 200 வளைவுகள், 16 குகைகள், 257 பாலங்களை கடந்து பயணித்து வருகிறது. பயணத்தின்போது காணக்கிடைக்கும் இயற்கை அழகு மற்றும் த்ரில்லிங் அனுபவம் சுற்றுலா பயணிகளை ஈர்க்கின்றது. ஆனால் தற்போது இந்த ரயிலில் பயணிக்க வேண்டும் என்றால் பல தடைகளை சந்திக்க வேண்டிய நிலை ஏற்பட்டுள்ளது.

1899 ஜூன் 15-ம் தேதி முதல் தனது பயணத்தை ஆரம்பித்த நீலகிரி மலை ரயில், நீலகிரி மலைகளின் அழகிய சின்னமாக திகழ்கிறது. 1908-ம் ஆண்டு உதகை புனித மேரிஸ் ஹில் பகுதியில் அமைந்த ரயில் நிலையத்திற்கு முதல் முறையாக இந்த மலை ரயில் வந்து சேர்ந்தது. 2005-ம் ஆண்டு யுனெஸ்கோ உலக பாரம்பரிய சின்னமாக இதனை அங்கீகரித்தது.

தொடக்க காலத்தில் 13 நிலக்கரி நீராவி இன்ஜின்கள் மூலம் இயங்கிய மலை ரயில், தற்போது 7 டீசல் இஞ்ஜின்கள், 2 நிலக்கரி பயர் இஞ்ஜின்கள் மற்றும் 5 டீசல் இன்ஜின்களை கொண்டு இயங்குகிறது. சில இன்ஜின்கள் பழுதாகி காட்சிப் பொருளாக வைக்கப்பட்டுள்ளன.

ஒரு காலத்தில் எளிதாக பயணிக்க முடிந்த மலை ரயில், தற்போது முன்பதிவின்றி பயணிக்க முடியாத நிலை ஏற்பட்டுள்ளது. கோடை சீசனில் இருமாதங்களுக்கு முன்பே அனைத்து இருக்கைகளும் முன்பதிவு செய்யப்பட்டு விடுகின்றன. உதகைக்கு வரும் சுற்றுலா பயணிகள் ஜெனரல் கம்பார்ட்மெண்டில் இடம் கிடைக்காமல் ஏமாற்றத்துடன் தவிக்கின்றனர்.

நீலகிரி மலை ரயில், சுற்றுலா பயணிகளுக்கு வசதியாக இருக்கும் போதிலும், உள்ளூர் மக்களுக்கு மிகப்பெரிய சிரமமாக மாறியுள்ளது. ரயிலில் பயணிக்க ஏதுவாக டிக்கெட் கிடைப்பதில்லை. நீலகிரி எக்ஸ்பிரஸில் சென்னைக்கு செல்ல முன்பதிவு செய்ய முடியாத நிலை உள்ளது. மேலும், மாணவர்களுக்கு மலை ரயிலில் எந்த தள்ளுபடியும், மாதாந்திர பாஸும் வழங்கப்படவில்லை. பள்ளி மாணவர்கள் மலை ரயிலின் பாரம்பரிய அருங்காட்சியகத்தையும் பார்ப்பதில்லை.

மேட்டுப்பாளையத்தில் இருந்து மலை ரயில் ஒரே ஒரு ரயில் மட்டுமே இயக்கப்படுகிறது. எனவே, நீலகிரி மக்கள் சாதாரண கட்டணத்தில் பயணிக்க டிக்கெட் வழங்க வேண்டும். நீலகிரி மலை ரயிலில் சென்னைக்கு நேரடி முன்பதிவு வசதி ஏற்படுத்த வேண்டும். வார இறுதி நாட்களில் மாணவர்கள் பயணிக்க கூடுதல் பெட்டிகள் இணைக்க வேண்டும்.

அனைத்து அரசு ஊழியர்கள், ஆசிரியர்கள், தொழிலாளர்கள் தினசரி பயணிக்க சீசன் டிக்கெட் வழங்க வேண்டும். காலையும், மாலையும் உதகையில் இருந்து ஒரு ரயில், குன்னூரில் இருந்து ஒரு ரயில் ஒரே நேரத்தில் இயக்கப்பட வேண்டும். மேலும், உதகை-குன்னூர் இடையே கூடுதல் ரயில் சேவை வழங்க வேண்டும் என மக்கள் கோரிக்கை விடுத்துள்ளனர்.