பெண் தேவதைகளின் வெண்ணிற சிறகுகள்

காலங்காலமாக கதைகளில்

கால்கள் தரையில் படாமல்

காற்றில் அசைந்து வரும்

பெண் தேவதைகளும்…

அவர்தம் வெண் சிறகுகளும்

கற்பனையாக இருக்கலாம் !

ஆனால்..

பெண்களில் தேவதைகள்

இருப்பது கற்பனை அல்ல...!

வெண்ணிற சிறகுகள்

பெண் தேவதைகளின் அடையாளமா ?

அங்கமான உறுப்பா? அல்லது

எண்ணங்களின் தொகுப்பா?

யோசிக்க வேண்டிய ஒன்று.!

தேவதைகளின் மனதிலிருக்கும்

தெரியப்படுத்த இயலாத

தனிப்பட்ட விருப்ப உணர்வுகளே

அந்த சிறகுகள் !

பறவைகளின் சிறகுகளை

பார்க்க முடிவது போல…

பெண்களின் விருப்ப சிறகுகள்

கண்ணுக்கு தெரியவில்லை

என்பதே உண்மை!

கூண்டுகளில் வாழுவதற்கு

சிறகுகள் எதற்கு என்று

சிலர் கழற்றி வைத்திருப்பர் !

அன்றி சூழ்நிலை காரணமாக

துண்டித்துக் கொண்டிருப்பர் !

அல்லது யாரேனும்

துண்டித்தும் விட்டிருப்பர் !.

சிறகுகள் இருந்தும்

பறக்க முடியாமல்...

முடமாக, ஜடமாக

சுவர்கள் நான்கிற்கிடையில்

அவர்கள் அடங்கி விடுகிறார்கள்!.

கதைகளில் காணும்

தேவதைககளுக்கு

சிறகுகள் இருப்பது போல...

குடும்பத்தில் வாழும்

பெண் தேவதைகளும்

சந்தோஷ சிறகை அசைத்து

மகிழட்டுமே !