தக்காளி இல்லாத சமையல்... ஆரோக்கியமானதா?நாடு முழுவதும் தக்காளி விலை உயர்வு, காரணம்...
நம் உடலில் நிகழும் வளர்சிதை மாற்றங்களுக்கு வைட்டமின்கள் அவசியம். தக்காளியில் வைட்டமின் ஏ, சி, டி, ஃபோலிக் அமிலம், பாஸ்பரஸ், இரும்புச்சத்து ஆகியவை உள்ளன.
கடந்த சில நாள்களாக எக்குத்தப்பாக எகிறிக்கொண்டிருக்கும் தக்காளி விலைதான் தலைப்புச் செய்தியாக இருக்கிறது. அன்றாடச் சமையலில் தவிர்க்கவே முடியாத சில பொருள்களில் தக்காளியும் ஒன்று. பிரியாணி தொடங்கி... சட்னி, சாம்பார் வரை எல்லா அசைவ, சைவ உணவுகளிலும் கூடுதல் சுவை சேர்ப்பது தக்காளிதான். ஆனால், தக்காளி விலையேற்றம், இனி தக்காளி தேவைதானா என்றே யோசிக்க வைத்திருக்கிறது.
சுவை என்பதைத் தாண்டி தக்காளி நம் ஆரோக்கியத்திலும் முக்கியத்துவம் பெறுகிறதா? தக்காளியில் உள்ள சத்துகள் என்னென்ன? தினமும் எந்த அளவில் தக்காளியை உணவில் சேர்த்துக்கொள்ளலாம்? நிபுணர்கள் விளக்குகிறார்கள்.
நல்லதும் உண்டு... அல்லதும் உண்டு...
``நம் உடலில் நிகழும் வளர்சிதை மாற்றங்களுக்கு வைட்டமின்கள் அவசியம். தக்காளியில் வைட்டமின் ஏ, சி, டி, ஃபோலிக் அமிலம், பாஸ்பரஸ், இரும்புச்சத்து ஆகியவை உள்ளன. தக்காளியில் உள்ள இரும்புச்சத்து, கல்லீரல் நோய் மற்றும் ரத்தச்சோகையிலிருந்து நம்மைக் காக்கும். தக்காளியில் உள்ள பீட்டா கரோட்டீன், பார்வைக் கோளாறு வராமல் தவிர்க்கும். மேலும் இதில் உள்ள வைட்டமின் சி சரும நோய்களிலிருந்து காக்கும். மாவுச்சத்து குறைவாக இருப்பதால் சர்க்கரை நோயாளிகள் தினமுமே தக்காளியைத் தங்கள் உணவில் சேர்த்துக் கொள்ளலாம்.
தக்காளியில் வேண்டாத சில விஷயங்களும் இருக்கின்றன. தக்காளியில் ஆன்டி ஆக்ஸிடன்ட் இருப்பதால் சிறுநீரக நோயாளிகள் தக்காளியை தினமும் உணவில் சேர்ப்பதைத் தவிர்க்க வேண்டும். இந்த ஆன்டி ஆக்ஸிடன்ட், திசுக்களில் கால்சியத்தைக் குவிக்கும். இதனால் மூட்டுவலி, மூட்டுகளில் வீக்கம் போன்றவை ஏற்பட வாய்ப்புண்டு. மேலும் மாலிக் அமிலம், சிட்ரிக் அமிலம் அதிக அளவு இருப்பதால் நெஞ்செரிச்சல், வாயுத்தொல்லை, வயிற்றுவலி, வயிற்றுப்போக்கு போன்றவை ஏற்படவும் வாய்ப்புண்டு.
உடலில் பிரச்னைகள் இருப்பவர்கள் மருத்துவரின் ஆலோசனையோடு தக்காளியை உணவில் சேர்த்துக்கொள்வது நல்லது.''
``தக்காளியில் அதிக அளவு ஊட்டச்சத்துகள் இருப்பதால் அதை அன்றாடம் உணவில் சேர்த்துக்கொள்வது ஆரோக்கியமானது. தக்காளியில் உள்ள சத்துகள் ரத்தச் சிவப்பணுக்களை அதிகரித்து உடலை எப்போதும் ஆற்றலுடன் வைத்திருக்க உதவும். இதில் உள்ள லைக்கோபின் இதய நோய்களைத் தவிர்க்கும் ஆற்றல் கொண்டது என்கின்றன ஆய்வுகள்.
ஆக்ஸலேட் எனும் சத்துதான், சிறுநீரகத்தில் கல் உண்டாக்கும் காரணிகளில் ஒன்றாக இருக்கிறது. அதனால் பெரும்பாலான மக்கள் சிறுநீரகக் கல் வந்துவிடும் என்ற பயத்தில் தக்காளியைத் தவிர்ப்பார்கள். ஆக்ஸலேட் தக்காளியில் மட்டுமல்ல, பீட்ரூட், கீரை வகைகள் உட்பட பல உணவுப் பொருள்களில் இருக்கிறது. தக்காளியில் ஆக்ஸலேட் சிறிதளவு மட்டுமே உள்ளதால் சிறுநீரகக் கல் பற்றி பயம்கொள்ள வேண்டாம்.''
வீட்டுத் தோட்டம்... இரண்டே மாதங்களில் அறுவடை ரெடி...
``மாடித்தோட்டத்தில் நாட்டுத் தக்காளி, வீரிய ரக தக்காளி என இரண்டு தக்காளி வகைகளைச் சாகுபடி செய்யலாம். ஏற்கெனவே வீட்டில் இருக்கும் தக்காளியிலிருந்து விதைகளை எடுத்துக் காயவைத்து, விதை நேர்த்தி செய்து பயிரிட வேண்டும். நாற்று நடவு செய்வது சிறந்த முறை. குழித்தட்டின் குழிகளைத் தென்னை நார்க்கழிவு கொண்டு நிரப்பிக்கொள்ளவும். அதில் கால் பங்கு அளவிற்கு சூடோமோனஸ் அல்லது டிரைக்கோடெர்மா கலந்து கொள்ளவும். இவை நிரம்பிய குழிகளில் விதைகளை நட்டு வளர்க்க வேண்டும். 25 நாள்களில் நாற்று தயார் ஆகிவிடும். அதன்பின் பெரிய தொட்டிகளில் மாற்றவும். அப்படி நடவு செய்த தக்காளிச் செடி 28-ம் நாள் முதல் 45-ம் நாளுக்குள் பூப்பூக்கும். இரண்டு மாதங்களில் அறுவடைக்குத் தயார் ஆகிவிடும். தொடர்ந்து இரண்டு, மூன்று மாதங்களுக்குக் காய்ப்பு இருக்கும். 15 நாள்களுக்கு ஒரு முறை தக்காளிச் செடிகளுக்குப் பஞ்சகவ்யா அல்லது மீன் அமிலம் போன்றவற்றை வளர்ச்சியூக்கியாகக் கொடுக்கலாம். செடிகளில் பூச்சித்தொல்லை இருந்தால், ஒரு லிட்டர் தண்ணீருக்கு 30 மில்லி வேப்பெண்ணெய் கலந்து செடிகள் முழுவதும் படுமாறு தெளிக்கலாம்.''
What's Your Reaction?
